Job 29

1 UJobe waqhubeka ngenkulumo yakhe wathi:

2 “Ngiyaziloyisa lezozinyanga esezadlulayo, lezozinsuku uNkulunkulu esangilinda,

3 lapho isibane sakhe sasikhanyisa phezu kwekhanda lami ngihamba ngokukhanya kwakhe emnyameni!

4 He, lezozinsuku ngisazizwa ukuthi ngiyimi, lapho ubudlelwano obukhulu loNkulunkulu babusendlini yami,

5 lapho uSomandla wayeseselami labantwabami besaphila lami,

6 lapho indlela yami yayifafazwe ngolaza ledwala langithululela izimpophoma zamafutha e-oliva.

7 “Ekuyeni kwami emasangweni edolobho ngafika ngahlala enkundleni,

8 amajaha angibona angixekela, abadala baphakama bema ngezinyawo;

9 amadoda ayizikhulu athula akaze akhuluma avala imilomo yawo ngezandla zawo;

10 amazwi ezikhulu ehliselwa phansi, indimi zazo zanamathela olwangeni lwazo.

11 Loba ngubani owangizwayo wakhuluma kuhle ngami, kwathi labo abangibonayo bangibuka,

12 ngokuba ngalamulela abayanga abacela uncedo, lezintandane ezazingelamuntu wokuzisiza.

13 Indoda eyayisifa yangibusisa; ngenza inhliziyo yomfelokazi yahlabelela.

14 Ngavunula ukulunga njengezigqoko zami; ukwahlulela kuhle kwaba yisambatho sami lengowane yami.

15 Ngangingamehlo kwabayiziphofu lezinyawo kwabaqhulayo.

16 Nganginguyise kwabaswelayo; ngayimela indaba yesihambi.

17 Ngawephula amazinyo ababi ngahluthuna labo ababebabambile ngamazinyo abo.

18 “Ngakhumbula ngathi, ‘Ngizafela endlini yami’, izinsuku zami zinengi njengezinhlamvu zetshebetshebe.

19 Izimpande zami zizafinyelela emanzini, amazolo azalala emagatsheni ubusuku bonke.

20 Udumo lwami luzahlala lulutsha kimi, idandila lami lilitsha esandleni sami.’

21 “Abantu babengilalela bathembe, belindele ukwelulekwa bethule zwi.

22 Nxa sekukhulume mina, kungakhulumi omunye njalo; amazwi ami ayengena kamnandi ezindlebeni zabo.

23 Babengilindela njengokulindela izulu, bawanathe amazwi ami njengezulu lentwasa.

24 Ngangisithi ngingababobothekela, bathabe bangakholwa; ukukhanya kobuso bami kwakuligugu kubo.

25 Yimi engangibakhethela ukuthi benzeni ngoba ngisanduna kubo; ngangihlala njengenkosi phakathi kwamabutho ayo; ngangifana lomduduzi wabalilayo.